Rut 2 | CAA | STEP | Pues e Noemí ayan inteꞌ ufamiliar xeꞌ tuaꞌ uviejo ani xeꞌ ucꞌabꞌa Booz. Pues e Booz jax inteꞌ winic xeꞌ ayan meyra ucꞌampibꞌir y xeꞌ ayan utumin y xeꞌ acꞌubꞌesna umen e gente.

Ruth 2

Conda e Rut ixin esto tama uchor e Booz

1 Pues e Noemí ayan inteꞌ ufamiliar xeꞌ tuaꞌ uviejo ani xeꞌ ucꞌabꞌa Booz. Pues e Booz jax inteꞌ winic xeꞌ ayan meyra ucꞌampibꞌir y xeꞌ ayan utumin y xeꞌ acꞌubꞌesna umen e gente.

2 Entonces tama inteꞌ día e Rut war uwira que matucꞌa ayan tuaꞌ ucꞌuxiobꞌ y tamar era uyare e Noemí y che:

—¿Erer ca inxin tama inteꞌ chor tuaꞌ inwira jay ayan tin e incꞌun uwirnar taniut xeꞌ axin uyacten inxin tupat e ajpatnarobꞌ tuaꞌ incꞌopi cora cora e cosecha lo que aquetpato tuyoc e chor conda acꞌapa amorojsena tunor era? che e Rut. Entonces ojron e Noemí y che:

—Erer iꞌxin, ijchꞌoc, che e Noemí.

3 Entonces ixin e Rut tama inteꞌ chor y cay ucꞌopi lo que actana umen tin e war apatnobꞌ tama e cosecha. Pero wacchetaca cꞌotoy unata que tuaꞌ e Booz e chor era. 4 Entonces conda yaꞌ war tama uyoc e chor e Booz cꞌotoy tama uxambꞌar tama e chinam Belén, y upejca e ajpatnarobꞌ y che:

—Que Cawinquirar Dios aquetpa tacarox, che jaxir. Y e ajpatnarobꞌ chenobꞌ:

—Que Cawinquirar Dios uchojbꞌesiquet net ubꞌan, chenobꞌ.

5 Entonces e Booz cay uyubꞌi tuaꞌ e man xeꞌ aquetpa tujor e inmojr manobꞌ y che:

—¿Chi tuaꞌ familia e ixic yax? che e Booz.

6 Y che e man:

—Jax e ixic xeꞌ tuaꞌ e lugar Moab xeꞌ sutpa tari taca e Noemí. 7 Yopa sajmi y ucꞌajti jay erer axin ticapat tuaꞌ ucꞌopi e cosecha lo que aquetpato tuyoc e chor, y caware que uyubꞌi. Y cay patna y bꞌan war uche tunor e día, y este era ixin tuaꞌ ajiri imbꞌijc tama e bꞌiqꞌuit otot bꞌana, che e man.

8 Entonces ixin e Booz esto tiaꞌ turu e Rut y che:

—Ubꞌin, ixic, ira iꞌxin tuaꞌ acꞌopi e cosecha tama otronteꞌ chor. Quetpen tara taca e ijchꞌoctacobꞌ xeꞌ manobꞌ tanibꞌa, 9 y iran tiaꞌ war apatnobꞌ e winicobꞌ y quiqui net tupatobꞌ taca e ijchꞌoctacobꞌ tuaꞌ amorojse lo que aquetpato tuyoc e chor. Inwareobꞌix e winicobꞌ era tuaꞌ machi upejquetobꞌ. Y conda ataqui atiꞌ, chꞌujcun awira tiaꞌ aquetpa e murur taca e jaꞌ xeꞌ taresna umen nimanobꞌ sajmi y uchꞌen tamar, che e Booz.

10 Entonces e Rut uche bꞌan cocha acay uchiobꞌ e gente tama e tiempo yajaꞌ y cotuan tut e Booz este que utacbꞌu ujor tut e rum y uyubꞌi tuaꞌ y che:

—¿Tucꞌa tuaꞌ que war itzay awiren y que incꞌun awirnar taniut cocha nen majax tuen e Israel? che e Rut.

11 Entonces ojron e Booz y che:

—Innata tunor lo que cay ache tuaꞌ atacre apixam desde que chamay aviejo y que ixiet awacta tunor atata y atuꞌ y e lugar tiaꞌ cuxpet tuaꞌ watet ituruan tacaron xeꞌ ajnajtir gention ani toit. 12 Que Cawinquirar Dios uyajqꞌuiquet meyra atuanibꞌir y que axin uchojbꞌeset Cawinquirar Dios xeꞌ ticabꞌa xeꞌ tuon e Israel xeꞌ jax xeꞌ war asajca tuaꞌ ucojcuet, che e Booz.

13 Entonces sutpa ojron e Rut otronyajr y che:

—Pues quisinic itzay awiren iraj iraj bꞌan cocha war ache era. Porque war atꞌabꞌse niwalma tacar awojroner xeꞌ incꞌun, motor que nen ma tawaren nien tuaꞌ inquetpa inteꞌ aman, che e Rut.

14 Entonces conda cꞌotoy e hora tuaꞌ awiobꞌ, e Booz upejca e Rut y che:

—Lar tara y chꞌama imbꞌijc e pan y tzꞌaya tama e salsa xeꞌ chembꞌir taca e vinagre, che e Booz.

Entonces e Rut turuan tuyejtzꞌer e ajpatnarobꞌ, y e Booz uyajcꞌu cora grano xeꞌ chꞌijrbꞌir y jaxir weꞌ este que chuan y quetpato lo que ajcꞌuna tuaꞌ ucꞌuxi. 15 Entonces conda achpa e Rut y ixin tuaꞌ ucꞌopi e cebada otronyajr, e Booz uyare umanobꞌ y che:

—Actanic tuaꞌ umorojse e cebada tic taca motor que tama utzajqꞌuir y ira iquete iwabꞌu. 16 Y actanic acꞌaxi tama icꞌabꞌ cora cebada tama utzajqꞌuir tuaꞌ uyubꞌi ucꞌopi jaxir. Y mamajchi tijam tuaꞌ icꞌaye e ixic era, che e Booz.

17 Entonces e Rut cay ucꞌopi e cebada tama e chor este que acbꞌare. Y de allí cay uwatzꞌi lo que cay umorojse y locꞌoy inteꞌ arroba ut e cebada. 18 Entonces sutpa ixin tama e chinam esto tiaꞌ turu upixam, y uqꞌueche ixin tunor ut e cebada lo que cay umorojse y uchecsu tut upixam. Y nacpat era ulocse lo que ayan tama ubolsa y uyajcꞌu e Noemí tuaꞌ ucꞌuxi.

19 Entonces che e Noemí:

—¿Tiaꞌ patnet sajmi? ¿Y tiaꞌ ixiet acꞌopi meyra cebada cocha era cocha machi uyubꞌiet ache tunor era abꞌajner? Que e Dios uchojbꞌesic ut tin e cay utacret tuaꞌ alocse meyra cebada cocha era, che e Noemí.

Entonces e Rut cay uchecsu tut upixam chi tacar cay patna y che:

—Pues ucꞌabꞌa e winic tiaꞌ cay patnen sajmi jax Booz, che e Rut.

20 Entonces tzay meyra e Noemí conda uyubꞌi que jax uchor e Booz tiaꞌ ixin e Rut tuaꞌ apatna y che:

—Que Cawinquirar Dios uchojbꞌesic ut jaxir umen que war aquetpa incꞌun uwirnar tacaron, y umen que war aquetpa cꞌar umener chi niviejo ani. Pues e winic era familia tacaron, y tamar era jaxir jax inteꞌ xeꞌ uyubꞌi ucojcon, che e Noemí.

21 Entonces ojron e Rut y che:

—Y uyaren que ererto impatna taca umanobꞌ este que acꞌapa amorojsena tunor e cosecha, che e Rut.

22 Entonces e Noemí uyare uyaribꞌ y che:

—Ijchꞌoc, quisinic iquetpa tuaꞌ ipatna taca umanobꞌ e Booz y que machi iꞌxin tama uchor otronteꞌ, porque tama uchor e Booz mamajchi tuaꞌ ucꞌayetobꞌ conda war amorojse lo aquetpato tor e rum tama e cosecha, che e Noemí.

23 Entonces e Rut quetpa yajaꞌ taca tuaꞌ ucꞌopi e trigo taca umanobꞌ e Booz este que cꞌapa morojsena tunor e cosecha tama e cebada y tama e trigo. Y tama tunor e tiempo era e Rut war aturuan taca upixam.